١ - بلحاظ اصوات اردو حروف تہجی کا تینتیسواں، عربی کا سترھواں اور فارسی کا بیسواں حرف۔ یہ اردو یا فارسی کے صرف ان الفاظ میں آتا ہے جو عربی الاصل ہیں۔ عربی میں اس کا نام 'ظا' ہے جسے 'ظائے معجمہ' یا 'ظائے منقوطہ' بھی کہتے ہیں۔ زبان کی نوک جب مسوڑھوں سے لگتی ہے تو یہ ادا ہوتا ہے (اس کا کوئی بدل نہیں) یہ کلمہ کے شروع میں بھی آتا ہے اور درمیان و آخر کلمہ میں بھی جیسے، ظاہر، اظہار اور غیظ وغیرہ۔ اردو میں اس کا نام ظوئے ہے اور اس کی آواز 'ز' سے ملتی جلتی نکلتی ہے۔ جمل کے حساب میں اس کی قیمت نو سو (900) ہے، یہ حرف شمسی ہے۔