مخروط

عربی زبان میں ثلاثی مجرد کے باب سے مشتق اسم ہے اردو میں بطور اسم نیز صفت مستعمل ہے۔ ١٩٢٢ء کو "فرودس تخیل" میں مستعمل ملتا ہے۔

١ - وہ چیز جس کا پیندا چوڑا اور سرا بتدریج پتلا ہوتا چلا گیا ہو، گاجر کی شکل کی چیز، گاؤ دم شکل یا چیز۔

"سورج کی کش کے ماتحت اس کا محور ایک مخروط بناتا ہے۔" ( ١٩٦٩ء، علم الافلاک، ١٧١ )

٢ - چو پہل مینار، اہرام۔

"اس نیم کٹہرہ کے اوپر ایک مکعب برج ہے جس پر ایک اہرام یا مخروط بنا ہوا ہے۔" ( ١٩١٣ء، تمدن ہند، ٣٨٨ )

٣ - کچ دھات کو بھٹی میں جھونکنے کے لیے لگایا جانے والا ایک آلہ جو مخروطی شکل کا ہوتا ہے اور زنجیر سے لٹکا ہوا ہوتا ہے۔

"بھٹی میں دھات جھونکنے کے لیے زنجیر کو ڈھیلا کرکے مخروط کو ناقلہ کے نیچے اتار دیتے ہیں۔" ( ١٩٤٨ء، اشیائے تعمیر (ترجمہ)، ١١١ )

١ - خراد | خراط کیا گیا، چھیلا گیا، تراشا گیا۔ (فرہنگ آصفیہ؛ جامع اللغات؛ علمی اردو لغت)

٢ - گاجر کی شکل کا، گاؤ دم۔

"سر پر مخروط کلاہ نمد جس پر چاروں طرف ریشم۔" ( ١٩٥٦ء، چنگیز (ڈرامہ)، ٩ )