ادھار

سنسکرت زبان سے اسم جامد ہے، سنسکرت میں 'اُدّھار' مستعمل ہے لیکن اردو میں بلاتشدد مستعمل ہے۔ سب سے پہلے "قطب مشتری" میں مستعمل ملتا ہے۔

١ - عارضی طور پر، مانگے کا، مستعار۔

 وہ چھینتا نہیں ہے کبھی دے کے ایک بار شایاں اسے نہیں ہے کہ بندوں کو دے ادھار ( ١٨٨٨ء، مجموعہ نظم بے نظیر، ١٧٣ )

١ - آئندہ ادائی کے وعدے پر لین دین، اچاپت، قرض، وام۔

"میں نے ادھار کا کام ہی نہیں رکھا۔" ( ١٨٧٤ء، مجالس النساء، ٧٩:١ )

٢ - وہ شے خصوصاً رقم جو وصول طلب اور واجب الادا ہو، قرضہ، دین۔

 صرف ساقی کا قرض دار ہوں میں اور مجھ پر ادھار کس کا ہے ( ١٩٠٣ء، سفینہ نوح، ١٨٨ )

٣ - آیندہ حاصل یا وصول ہونے والی چیز یا عمل، موعود، متوقع، آیندہ ہونے یا کیا جانے والا حساب کتاب۔

 ساقی ہے مغنی ہے چمن ہے مے ہے اس نقد پہ سو ادھار قربان کر دے ( ١٩٣٣ء، سیف و سبو، ٢٦٢ )

١ - ادھار آنا

(کسی چیز کا) اچاپت پر خریدا جانا۔'میرے یہاں کبھی کوئی چیز ادھار نہیں آتی۔" ( ١٩٢٤ء، نوراللغات، ٢٩٨:١ )

وصول طلب اور واجب الادا ہونا۔ بولے وہ بوسے کے تقاضے پر کچھ تمھارا ادھار آتا ہے ( مسرور، (نوراللغات، ٢٩٨:١) )

٢ - ادھار کھانا

قرض لے کر گزر بسر کرنا، اچاپت رکھنا۔'دکان کی آمدنی بند ہے مجھ کو ادھار کھانا پڑتا ہے۔" ( ١٩٢٤ء، نوراللغات، ٢٩٨:١ )

(کسی چیز پر) تل جانا، (کسی کام پر) تکیہ کرنا، آمادہ ہونا۔ نقد دل لے لیا تو چھوڑی جان خوب کھایا ادھار کیا کہنا ( ١٩٠٥ء، دیوان انجم، ٢٠ )