فعل متعدی
١ - جھگڑا کرانا، مار پیٹ کرنا (دو یا زیادہ آدمیوں یا جانوروں کو) آپس میں بھڑا دینا۔
"ہاتھی، اونٹ. بارہ سنگھے.تیتر بٹیر بھی لڑائے جاتے تھے۔"
( ١٩٨٨ء، لکھنویات ادب، ٣ )
٢ - باہم فساد کرانا، اختلاف پیدا کرنا، نزاع پیدا کرانا۔
آنکھ اوس شوخ نے ہر اک سے لڑا کر جرات ہم کو سب سے یہ لڑایا ہے کہ جی جانے ہے
( ١٨٠٩ء، جرأت، کلیات، ٢٣٨ )
٣ - جنگ کرانا، لڑائی کرانا۔ (علمی اردو لغت، فرہنگ آصفیہ)۔
٤ - کشتی کرانا، زور کرانا، مقابلہ کرانا۔
"میں آج اکھاڑے پر نہیں آؤں گا تم سب کو لڑا دینا تاکہ ناغہ نہ ہو۔"
( ١٩٧٨ء، مہذب اللغات، ١٥٣:١١ )
٥ - [ پنجہ کشی ] زور آزمائی کرنا، زور کرنا۔ پنجے میں پنجہ ڈال کر زور آزمائی کرنا، (ماخوذ: جامع اللغات، مہذب اللغات)۔
٦ - بدکلامی کرنا، دو بدو کرنا، ترکی بہ ترکی جواب دینا۔
ہم تم چلیں جو ساتھ تو مٹ جائے رنگ باغ گل سے رخ آپ لالہ سے بندہ لڑائے داغ
( ١٨٧٢ء، عاشق لکھنوی، فیض نشاں، ٩٨ )
٧ - [ کنایۃ ] دو چیزوں کو باہم ٹکرانا۔
پہونچتی ہے شکست اک دن بتوں سے شیشۂ دل پر لڑایا جاتا ہے یہ آبگینہ زور پتھر سے
( ١٨٤٢ء، دیوان رند، ١٧٩:١ )
٨ - متوجہ کرنا، مصروف کرنا، بے حد کوشش کرنا۔ (جامع اللغات، مہذب اللغات)۔
٩ - ملانا، سامنے کرنا، گھورنا (آنکھ سے آنکھ یا نظر سے نظر ملانا یا لڑانا) آنکھ لڑانا، نظر لڑانا بطور تراکیب بھی مستعمل ہے۔ (جامع اللغات، مہذب اللغات)۔
١٠ - شریک کرنا، ملانا، ساجھا کرنا (روپے پیسے سے)۔
"چار چار پیسے لڑا کر سودا کھایا۔"
( ١٩٠١ء، فرہنگ آصفیہ، ١٨٦:٤ )
١١ - [ قمار باز ] دانو پر لگانا، دانو پر رکھنا۔ (ماخوذ: فرہنگ آصفیہ، جامع اللغات)۔
١٢ - [ ریاضی ] مطابق کرنا، میزان کرنا۔ (ماخوذ جامع اللغات)۔
١٣ - [ پتنگ باز ] پیچ کرانا، گھسا بازی کرانا۔
"اپنے ہاتھ سے پتنگ بناتے تھے اور خود لڑاتے تھے۔"
( ١٨٩٦ء، سیرت فریدیہ، ٤٣ )
١٤ - آزمانا، کرنا۔
"انہوں نے. کہا کوئی تگڑم لڑانا پڑے گی۔"
( ١٩٨٧ء، روز کا قصہ، ٨٨ )