اسم نکرہ ( مؤنث - واحد )
١ - مادۂ اسپ۔
"شیوراج سنگھ کے اصطبل میں تو بالعموم دو گھوڑیاں ایک سواری اور ایک نسل کشی کی غرض سے بنی ہی رہا کرتی تھیں۔"
( ١٩٨٧ء، ابوالفضل صدیقی، ترنگ، ١٤ )
٢ - [ پکوان پونی ] سویاں توڑنے کی ڈھیکلی کی قسم کی دستی کل جس میں اوکھلی کی وضع کا ایک سوراخ دار توا معہ موسلی کے ہوتا ہے اور موسلی کی داب سے سویوں کا لچھا نکلتا ہے۔ (ماخوذ: اصطلاحات پیشہ وراں، 178:3)
٣ - [ سلائی بٹائی ] ریشم کے بٹائی کے تاروں کو اوپر اٹھائے رکھنے والا چوبی چوکھٹا جس سے تار لٹوؤں میں بندھے لٹکتے رہتے ہیں جن کو گھما کرتا ربٹا جاتا ہے، چمبل۔ (اصطلاحات پیشہ وراں، 27:2)
٤ - [ دری بافی ] وہ لکڑی جس پر مکڑا ٹکا رہتا ہے۔ (اصطلاحات پیشہ وراں، 106:2)
٥ - بیاہ کے گیت جو و داع سے قبل گائے جاتے ہیں (ان معنوں میں عموماً بعینغۂ جمع) سہاگ گھوڑیاں۔
"سہاگ، گھوڑیوں، کامن، سٹھنیوں اور ڈولی چڑھنے کے گیتوں میں بالکل ویسی ہی سچی اور کھیری واقفیت ہوتی ہے جسی دوسرے گیتوں . میں علی العموم پائی جاتی ہے۔"
( ١٩٦١ء، ہماری موسیقی، ١٥٦ )
٦ - [ کھیل ] چڈھی چڑھول، آنکھ مچولی یا چدر چھپول وغیرہ میں جس پروہ سوار ہوں یعنی جس کی چڈھی لیں اسے گھوڑی کہتے ہیں۔ (فرہنگ آصفیہ، علمی اردو لغت)
٧ - ٹکٹکی جو نیچے میں ہوتی ہے تاکہ حقے کی نے یا لمبی سٹک کے بوجھ سے حقہ گر نہ جائے۔
"چلم کہ ڈیڑھ پاؤ تمباکو آئے، نے ہے کہ یہاں سے وہاں تک چلی گئی ہے نے کو سنھبالنے کے لیے کئی کئی گھوڑیاں دے رکھی ہیں۔"
( ١٩٤٧ء، فرحت، مضامین، ٣٨:٢ )
٨ - [ گھڑی سازی ] گھڑی کے چکر کی چوکی کے سوراخ کا توا یا پروا، پلیٹ، دڑی۔ (اصطلاحات پیشہ وراں، 166:1)
٩ - دو چوبی پایوں پر لیٹواں جڑا ہوا ڈنڈا جس پر عموماً کپڑے لٹکائے جاتے ہیں۔
"بیگم شائستہ رانا ایک بار پھر بڑے سکون سے ڈریسنگ روم میں و آپس چلی گئیں تیز تاریخی رنگ کی سلک کی ساری اتار کر گھوڑی پر ڈالی۔"
( ١٩٦٩ء، وہ جسے چاہا گیا، ٨١ )
١٠ - [ نائی ] بیچ میں سے چری ہوئی کھیچی جس سے ختنہ کے وقت کھال دبا کر کاٹتے ہیں تاکہ کھال پیچھے نہ سرک جائے۔
"دن بھر انتظار رہا کہ دیکھیے کب تسلا، لوٹا، گھوڑی، استرا آکھت کا سامان آتا ہے۔"
( ١٩٢٥ء، اودھ پنچ، لکھنؤ، ١٠ )
١١ - لکڑی کے قد مچے یا پائیدان جن میں دو تین سیڑھیاں بنی ہوتی ہیں، جو مکانات کی تعمیر یا پتائی وغیرہ استعمال کرتے ہیں۔
"گھوڑیوں یا خالی پیپوں سے عملی پلیٹ فارم بنا لیا جاتا ہے۔"
( ١٩٤٨ء، رسالہ رڑ کی چنائی، ٢٥ )
١٢ - چھوٹی خانے دار الماری جس کے اوپر یا جس میں جوتے رکھے جاتے ہیں۔
"بوٹ ریک (Bot Rack) جوتے رکھے کی گھوڑی ایک عدد۔"
( ١٩١٦ء، خانہ داری (معشیت)، ٥١ )
١٣ - لکڑی یا ہاتھی دانت کا ٹکڑا جو ستار میں لگاتے ہیں اور جس پر تار رکھتے ہیں۔
"بکس پر ہاتھی دانت کی ایک گھوڑی . نصب ہوتی ہے جس پر سے تار گزر کر دوسری طرف لکڑی کی چابیوں میں جڑے ہوتے ہیں۔"
( ١٩٦٧ء، آواز، ٥٦٧ )