اسم نکرہ ( مذکر - واحد )
١ - منھ، دَہن۔
"ناک کھڑی ہوئی اور دہانہ چھوٹا تھا۔"
( ١٩٤٤ء، نقش و نقاش، ٩ )
٢ - وہ مقام جہاں دریا گرتا یا ختم ہوتا ہے۔
"اگر نیل (دریائے نیل) نہ ہوتا تو مصر سو فیصد صحرا ہوتا اور یہ اپنے دہانے سے چار ہزار میل دور جھیل وکٹوریہ سے نکلتا ہے۔"
( ١٩٨٠ء، دجلہ، ٢٥ )
٣ - مشک کا منہ۔
"مشک کے دہانے سے نکلا ہوا پانی اور پھر جھمکتے ہوئے کٹورے میں۔ میں نے غٹاغٹ پیا۔"
( ١٩٨٤ء، زمیں اور فلک اور، ٣٣ )
٤ - موری، بدررو، نالی۔
"اس نے اس نہر کے دہانے کے بنانے میں غلطی کی۔"
( ١٩٥٣ء، حکمائے اسلام، ١٠٠:١ )
٥ - قدرے خار دار آہنی سلاخ جس کے دونوں طرف سلاخیں چسپاں ہوتی ہیں ان آہنی حلقوں میں لگام کا چرمی تسمہ لگا ہوتا ہے اس کا خار دار حصہ گھوڑے کے منہ میں زبان کے اوپر رہتا ہے جب گھوڑا شرارت کرتا ہے تو لگام کھینچ کر اس کو قابو میں کیا جاتا ہے۔ جس سے خار دار حصہ اس کے منہ میں چبھنے لگتا ہے۔
"میرے منہ میں لوہے کی ایک چیز لگا دیتا ہے جس کا نام اُس نے دہانہ رکھا ہے۔"
( ١٩٤٢ء، الف لیلہ و لیلہ، ٣٦٢:٢ )
٦ - کان کا مخرج، راستہ، آخری حصہ، سرا۔
"وہ سڑک جو اژدھے کی طرح ہانپ رہی ہے، جس کے خاتمے پر مہیب دہانہ ہے۔"
( ١٩٦٢ء، معصومہ، ٢٤٧ )
٧ - آتشیں ہتھیار میں وہ جگہ جہاں سے گولہ یا گولی باہر نکلتی ہے۔
قوموں پہ فلاکت لانے کو شاہوں کے خزانے کھلتے ہیں درس امن و اماں کا دینے کو توپوں کے دہانے کھلتے ہیں
( ١٩٣٣ء، فکرو نشاط، ٤٦ )
٨ - غار کا منہ یا ابتدائی حصہ۔
خون شاخوں سے ٹپکتا ہے دہانہ، غار بے آبا دہے!
( ١٩٦٦ء، زرد آسمان، ٦٦ )
٩ - پہاڑ کا وہ ڈھلوان حصہ جو کسی مادے کے اخراج کا کام دیتا ہے۔
"مجموعی طور پر کرو (Curve) کی شکل ایک آتش فشاں کے کریٹر (Crater) یعنی دہانے کے مشابہ ہوتی ہے۔"
( ١٩٧٣ء، نکلیائی توانائی، ١٤ )
١٠ - سوراخ۔
"حکیم افلاطون کا قول ہے کہ لڑکا اس بوتل کے مانند ہے جسکا دہانہ تنگ ہوتا ہے۔"
( ١٨٧٣ء، عقل و شعور، ٣٦ )
١١ - آتشی شیشہ، محدب عدسہ، لینز (Lens)۔
"آنکھ کے رخ کے سرے پر قعری عدسہ ہوتا ہے . دوسرے سرے پر حدبی عدسہ جو منظری عدسہ یا دہانہ کہلاتا ہے۔"
( ١٩٦٥ء، روشنی کیا ہے (ترجمہ)، ٥١ )