اسم حاصل مصدر ( مذکر - واحد )
١ - پیوستگی، اِقّتِرانِ باہمی، ملا ہونا، ملنا، یکجائی۔
شعر کیا ہے عقل و جنوں کی مشترک بزمِ خیال شعر کیا ہے عشق و حکمت کا مقامِ اتصال
( ١٩٣٣ء، سیف و سبو، ٥٧ )
٢ - قرب، نزدیکی۔
"راجا وہاں کا . پہاڑ کے اتصال کے سبب امرائے بادشاہی سے اکثر اوقات بگڑا رہتا ہے۔"
( ١٨٠٥ء، آرائش محفل، افسوس، ٢١٤ )
٣ - پے در پے، یکے بعد دیگرے یا لگاتار ہونے کا عمل، تسلسل۔
یہ اتصال اشک جگر سوز کا کہاں روتی ہے یوں تو شمع بھی کم کم تمام شب
( ١٨١٠ء، میر، کلیات، ١٦٦ )
٤ - وہ بات جس میں دو چیزیں ملتی جلتی ہوں، یکسانی، مشابہت۔
ہو گیا ثابت شکر لب ہوتے ہیں شیریں کلام اتصال ذائقہ شہد و شکر میں دیکھ کر
( ١٨٧٢ء، دیوان قلق (مظہر عشق)، ٧٢ )
٥ - دو چیزوں کے ملنے کی جگہ، سنگم۔
"بینک ہوٹل سری نگر کی سڑک اور مری کی سڑک کے اتصال پر واقع ہے۔"
( ١٩٤٤ء، سوانح عمری و سفرنامہ (حیدر)، ١٦٦ )
٦ - [ اصول حدیث ] کسی حدیث کے سلسلہ سند کا غیر منقطع ہونا یا سلسلہ سند کے تمام راویوں کا نام بنام ذکر۔
"اور عدم سکوت کا نام اتصال ہے۔"
( ١٩٥٦ء، مقدمہ مشکوٰۃ شریف(ترجمہ)، ٨:١ )
٧ - [ طب ] جسم کے حصوں کا ایک دوسرے سے پیدائشی اور قدرتی طور پر ملے ہونا۔
"سر کے اتصال طبعی میں فرق آ جانے سے وہ کمزور ہو جاتا ہے۔"
( ١٩٤٧ء، جراحیات زہراوی، ٦ )
٨ - [ سائنس ] کشش یا جذب جس کی وجہ سے اجسام یا ان کے اجزا ایک دوسرے کو اپنی طرف کھینچتے ہیں۔"
جانتے ہو تم کہ کیا ہے اتصال? وہ کشش ہیں جس سے ذرات ایک جا
( ١٩١٦ء، سائنس و فلسفہ، ٨٠ )
٩ - [ صرف ] دو ہم جنس حرفوں کو باہم ملانے کا عمل جو عموماً ان کے درمیان 'ا' لگانے سے ہوتا ہے۔
"یہ حرف الف کئی خواص رکھتا ہے، کبھی اتصال کے لیے آتا ہے، جیسے : لبالب اور دمادم وغیرہ۔"
( ١٨٧٣ء، عقل و شعور، ٨١ )
١٠ - [ نجوم ] ستاروں کا ایک دوسرے کو اپنے برج سے دیکھنا، ایک ستارے کا رخ دوسرے کی طرف ہونا(جس کا سعد، نجس یا میانہ اثر حالات پر پڑتا ہے)۔
شرف گھر سے وہ کرتا ہے اتصال ہے مشہور خانہ جدی میں کمال
( ١٩٠٢ء، سیر افلاک، ٧ )
١١ - [ لسانیات ] زبان کے اصل لفظ کو کسی اندرونی تبدیلی کے بغیر اسی زبان کے فرعی لفظ کے ساتھ جوڑنا اور نئے معنی پیدا کرنا، تالیف، (انگریزی) Agglutism۔
"پوپ نے اتصال اور اشتقاق یا تصریف جیسی اصطلاحوں کو استعمال نہیں کیا ہے۔"
( ١٩٦٤ء، زبان کا مطالعہ، ٥٧ )